وصية لبناتي الاتنين لما تيجي تتجوزي :
-اتجوزي حد زيك ماديا و اجتماعيا و دراسيا و ثقافيا
-افتكري ان اهله دول هم اللي هتروحي عندهم كل اسبوع تقضي يوم في بيتهم.
نقي البيت ده كويس .
شوفي حماكي بيعامل مراته ازاي ، هتتعاملي زيها بعد شويه،
-شوفي حماتك و حماكي بيتهم عامل ازاي ، لو بيتكم مش كده، اجري .
-اخوات خطيبك ده هيبقوا عمات عيالك . ايه النظام ؟ عارفة تقضي معاهم يوم زي اصحابك؟ بيلبسوا و بيتكلموا زيك ولا بتقعدي مستغرباهم ؟. هم دول اللي هيبقوا عيلتك ، لو مش زيك انتي و اهلك اجري على بيتكم .
- لو حسيتي ان حماكي و لا حماتك بيعاملوكي وحش و لا مش طايرين بيكي ، اجري. هيطلع علي عينك بعد كده . في ناس موءذيه . لو وقعتي في دول ، اجري فورا.
- لو اهلك قالولك بلاش الجوازه دي ، اسمعي كلامهم . هم فاهمين اكتر منك و افتكري انك في اول خناقه بينكم مش هتعرفي تروحي لاهلك تشتكي .
- لو اتنيلتي على عينك و اتجوزتي حد اهلك مكانوش موافقين عليه و ضايقك ، اشتكيه لاهلك ، هم عارفين انك صغيره و احتمال يقطموكي بكلمتين بس في الاخر، هيجيبولك حقك .
-حماتك لازم تحسي انها زي مامتك بالظبط، جوزك يزعلك ، تكلميها تاخدلك حقك منه وزيادة. لو شايفاها مش هتعمل كده و نظام ابني ملاك و يا بخت اللي تتجوزه و هي تطول ، اجري بسرعة .
( حلو كده ؟ تم حذف الماديات بنجاح )
كلمتين تحطيهم حلقه في ودنك : لو بيت حماكي مش زي بيت أبوكي، متتحركيش من بيتكم .
البنت تطلع متنزلش .
إختاروااللي شبهكم