كاوتش العربية ...اللي المفروض انه جديد...فيه مسمار ...
بقالي اكتر من خمس شهور عارف ومتأكد ان كاوتش العربية ...اللي المفروض انه جديد...فيه مسمار ...
كل ما يقل الهوا فيه...ادخل اى ورشة كاوتش ازوده وامشي....
ولما الموضوع حسيته بيحصل كتير ...عملت فيها ناصح...مش اروح اصلحه..لا...اشتريت منفاخ.. inflator عقبال عندكم ..😊😊
الموضوع اتطور...بقيت لازم اخرج الصبح بدرى عشر دقايق عشان انفخ الكاوتش....وبعد الشغل انفخه في عشر دقايق كمان 😀...
ولما لقيت ان المنفاخ بياخد وقت طويل...اخيرا وصلت للحل ...مش اروح اصلحه!!! ..برضه لأ...لسه
اشتريت المنفاخ بتاع Costco اللي بينفخ اسرع ...فبكده...بقيت بنفخه في خمس دقايق بدل عشرة ...وده طبعا لان الوقت كالسيف...😊
بعد خمس شهور من المشكله دى ....وصلت لمرحلة انه بنفخه حوالي اربع مرات في اليوم...بس بالمنفاخ السريع 😀...فحسيت ان الدنيا ماشيه...وأن دى تيجى ايه في معاناة ناس تانية كتير ...
المحصلة بعد خمس شهور...
تكلفة نفخ الكاوتش ما بين نفخه في ورشة الكاوتش وتمن المنفاخين...لا تقل عن ٢٠٠٠ جنيه
الوقت اللي ضيعته في نفخ الكاوتش علي مدى خمس شهور كانت 3759 دقيقة تقريبا ...يعنى حوالي يومين ونص....
ولانى بسوق كتير ...عملت بالعربية في المدة دى حوالي 35 الف كيلومتر..وهى بالحالة دى !!!!!!
المهم....لما قررت انى اصلح الكاوتش....اتكلف ٢٠ جنيه ..واتصلح في ربع ساعة 😔😔
الموضوع طبعاً عبارة عن كوميديا سوداء...لانه غير خسارة الوقت والفلوس...كان ممكن يكون فيها خسارة ارواح !!!!
الخلاصة اننا بنفس المنطق...في وسط دوامة حياتنا...بنتعامل وبنحاول نتكيف مع اوضاع وظروف غلط كتير في حياتنا لشهور واحياناً سنين....
و بدل ما ننهى الامور بشكل جذري ...
او نبعد بشكل قطعي ...
بنحاول نتعايش رغم الخسارة ورغم معرفتنا ان اللي احنا فيه ده غلط..
قد نُخدع بأن الخسارة بسيطة وقد تكون منعدمة...
لكن الواقع بيقول غير كده...
ان الخسارات البسيطة المُجمعة...
محصلتها خسارة كبيرة وقد تكون كارثة هائله ممكن يكون التمن حياتنا كلها🖤🖤