ماتحرمش ابنك من الوجع!!
جملة فضلت بفكر فيها وعارفة ان ناس كتير ممكن ماتعجبهاش…
خلينا نتفق ان الحياة لا تخلو من 'الوجع' وكلنا عندنا من المخزون يفيض…
لكن يبقى السؤال..
"هل دورنا نحمي ولادنا من الوجع ولا احسن لهم نعلمهم يتعاملوا معه؟؟؟؟"
ساعات بشوف بنتي بتمر بموقف يضايقها وفي ايدي الف حل ومخرج لكن بقول لنفسي… "هل كل مرة هكون موجودة علشان اتصرفلها وافكرلها؟"
متحرمش ابنك او بنتك من انهم يتعاملوا مع مشاعرهم السلبية… الخوف، الظلم، الوحدة الخ الخ الخ لانهم جزء من الحياة ومحدش بيعرف يستخبى منهم.
بالعكس ممكن حمايتك الزيادة تضعف شخصيتهم او يتحولوا لأشخاص 'بتهرب' من الوجع بمسكنات وقتية زي العلاقات الكتير، المخدرات او حتى ادمان الشغل!
طيب ممكن امرن ولادي ازاي؟
خلونا نتفق ان في كل الحالات ماينفعش 'الهيهم' عن الوجع او 'اقلل' منه بالعكس لازم اقولهم اني سامعهم وحاسس بيهم.
- لو الطفل اقل من ٢-٣ سنين ممكن تقوم تساعد وتفهموا ببساطة
من ٣-٥ بتساعده بإستخدام اسئلة ممكن يكون الحل ايه؟ طيب تحب تعمل ايه؟ ممكن اساعد ازاي؟
من ٦ سنين بتسأله اتصرفت ازاي؟ طيب لو دة حصل تاني هتعمل ايه؟
من ١٠ سنين بتسمع وتحضن وتقوله "حاسس بيك" … ممكن تعمل ايه يخليك تحس احسن؟" وهنا لازم يتعلم انه هو المسؤول عن مشاعره وعن التعامل معاها
وتحت اي ظرف…. ارجوك بلاش كلام يكون فيه
"احسن"
"تستاهل"
"انا قلتلك"
"انا لو مكانك"
"بلاش اڤورة"