هو ليه بنقول لمصطفي يا درش او نقول لحسن يا ابو علي ولمحمود يا ابو حنفي.. ولاسماعيل يا ابو السباع واخرى

-1-

-2-

 

هو ليه بنقول لمصطفي يا درش  او نقول لحسن يا ابو علي.. ولمحمود يا  ابو حنفي.. ولاسماعيل يا ابو السباع..  خليني اقولك الحاجات دي جات منين: 

- ابو السباع:

 أي حد اسمه اسماعيل بيتقاله يا ابو السباع.. لان المصريين عرفوا ان الخديوي اسماعيل بعت يعمل 4 سباع برا بفلوس كتير جدا ( 198 ألف فرنك) فبقوا يقولوا ع اسماعيل (ابو السباع) .. ومن ساعتها بيقولوا ع اي حد اسمه إسماعيل ابو السباع.. اللي هي تماثيل الاسود بتاعت كوبري قصر النيل.

- درش:

 أبو أبو درش في واحد اسمه السلطان مصطفى العثماني.. ودا يا سيدي ليه قصة شيقة ومثيرة حاكيها في كتابي الجديد.. المهم الراجل دا تنازل عن الحكم، وانضم إلى طائفة الصوفية اللي بيطلق عليهم بالتركية.. لقب درويش .. وكلمة درويش معناها أي (على باب الله).. ومن كلمة درويش جات كلمة درش.

- ابو حجاج.

. ابويا دايما كان يقول لعمي يوسف.. يا ابو حجاج.. كنت بستغرب قوي خصوصا ان عمي يوسف مالوش غير ابن اسمه حسين وابن اسمه محمد.. سالته.. ليه؟؟  قالي والله ما عارف اهو جدودنا بيقولوا كدا.. بالبحث .. عرفت انها تقال نسبة للحجاج بن يوسف الثقفي.

- حسن أبو على .

.  دي بتتقال عشان سيدنا علي بن ابي طالب والد الحسن والحسين. 

- ليه بنقول لمحمود يا ابو حنفي.

. قالك عشان أشهر تلاميذ الإمام أبو حنيفة ( أبو المؤيد محمود الخوارزمي) واللي جمع الأحاديث اللي أخرجها أبو حنيفة. 

 - اللي اسمه ابراهيم بنقوله يا ابو خليل..

 عشان سيدنا ابراهيم كان معروف باسم "ابراهيم الخليل".. وكمان موجود المسجد الإبراهيمي في  مدينة الخليل في مغارة المكفيلة ويُعتقد أن إبراهيم دفن فيها.

- ابو عوف.. اللي اسمه عبد الرحمن بنقوله يا ابو عوف..

 عشان الصحابي عبدالرحمن بن عوف.

-3-

-4-