كاس المشاعر قاسي

-1-

-2-

 كاس المشاعر قاسي .. د مجدي إسحق 

اللي بيشرب منه علي مرة واحدة بيدوق العذاب ليل قبل نهار ..

كاس و بيلف علي كل الناس ، و اللي يشرب ، بالراحة قوي و علي اقل من مهله، و يحرّص قوي ،  و يجرب بس بالملعقة ، علشان صدمة المشاعر بتعور ..

في الصداقة : علي مهلك، و ما تفتحش قلبك كله ، و ما تآمنش مرة واحدة.. اتحرك بالراحة و اكتشف علي بشويش ، و حط للعلاقة اسم صح : معرفة ، زميل ، صديق ، صديق مقرب ، صديق قوي لدرجة الأخ.. 

و علي اساس تصنيفك قرب بالراحة علشان ما تتخدعش..

اللي يطلع محل ثقتك، قرب بحكمة و حتة حتة ، و اللي ما يطلعش، ارجع خطوتين تلاتة ، أو لو الأمر أحتاج ابعد ..

برضه في العتاب، اوعي تصدق ان كل الناس زي بعض .. فيه واحد بيحبك ، العتاب يحببكم في بعض اكتر .. و فيه واحد ما بيحبكش من جواه لا ح يسمع و لا ح يقبل، و مش ح ينوبك منه غير البهدلة النفسية ..

و الحل ؟؟ عاتب بالراحة قوي و في كلمتين ؛ لو حسيت انه فاتح قلبه وودنه، كمل، و لو اتعفرت و اتغجر اسحب نفسك من الكلام و ما تعاتبوش تاني خالص، و الاحسن برضه تبعد ، و تقلل احتكاكك بيه خالص..

كمان في الحب و الارتباط، اوعي "تندلق" و "تفتح " قلبك علي الآخر و من أول يوم .. 

اوعي تندفع ؛ خد المشاعر علي الهادي ، و اكتشف نفسك و طبعك معاه .. المشاعر بتعمي، و بتغطي علي العيوب ، و صدق اللي قال "مراية الحب عميا" ..

و مع كل ده استشير و أسأل و صلي و كون فكرة حقيقية عنه و عن أخلاقه و سلوكه و التزامه و عيلته و اصحابه و طموحاته..

غير كده ، ح تتورط، و البعد ح يبقي بطلوع "الدم" و انك تكمل معاه "بزيادة الهم و الغم" ..

لو اكتشفت انه "مشاعر" و بس ، و كل حاجة تانية مش ماشية، خليك شجاع و استشير ، ووقف العلاقة لغاية ما تحسبها ، او انهيها لو لزم الأمر..

كاس المشاعر بجد قاسي و عاوز اللي يعلمك ازاي تتعامل معاه ..

-3-

-4-